أم خايفة على ابنها وهو ماشي بالشارع؟ بنت أبوها طلع بالسيارة وما رجعش عالبيت؟ ما بنقدرش نقبل بواقع اللي حياتنا فيه مستباحة للعنف والجريمة. لازم نطرد الخوف من بيوتنا ومن شوارعنا، وهاد بصير من خلال تغيير السياسات.

وهاي خطتنا: نرجّع الميزانيات والبرامج لمكافحة الجريمة اللي حكومة اليمين المتطرف قصّتها، ونعزّز السلطات المحلية العربية؛ نُلزم الشرطة إنها توفّر الحماية للمهدَّدين والشهود والمشتكين، ونحوّلها من جهاز بمارس العنف ضدنا إلى جهاز بفكك منظمات الإجرام وبيخدمنا وبيخدم مجتمعنا؛ ونحل مشكلة الشباب اللي لا بشتغلوا ولا بدرسوا من خلال برنامج مدني يشمل سنة تطوع بالمجتمع، إكمال شهادة الثانوية، وتأهيل مهني.